أخبار عاجلة
الزمالك يؤازر ساسى وبوطيب: دائماً هم الأفضل -

المعلقة السودانية الحب في زمن الثورة! .. بقلم: فيصل الدابي

المعلقة السودانية الحب في زمن الثورة! .. بقلم: فيصل الدابي

العزم العندك ما راح
الجوهرة تهديك عينيها
وتملا حياتك افراح
الناس الوقفو معاكم
والعملو الحاجات الصاح
زفوكم زفة ثورية
الليل قلبوه صباح!
مبروك وبيت مال وعيال
وسلامتك يا سامح وسلامات
&&&
معقول شان واحد بس 
يتحاصر كل السودان !
افتونا يا ناس الدنيا 
جننا جن الاخوان  !
شبكونا يوماتي حوار  
للنضمي فاتحين دكان  !
ويوماتي بيصادرو جريدة  
ويوماتي فاكين بمبان !
الفوضى حلقت كابوريا 
الجوطة ولدت تومات!! 
&&&
الحالة بس زي الطين 
في جيبنا مافيش ملين! 
وأي سعر أصبح سعران 
ما بنقدر ندخل دكان! 
والسوق أصبح مطلوق 
وأي قرش أصبح ممحوق! 
يا حليلو زمن الضيفان 
ما بنقدر نعزم إنسان! 
على فطرة بموية فول 
لا جبنة فيها لا زيت 
لا سلطة لا طعميات !!
&&&
والهون رفع التلفون 
في لحظة ضرب البليون!
والهم واقف طابور 
من تصبح ما نلقى فطور!
الفات فات لف اللفات 
في جيبو الكنجالات !
من مافي ركب العربات 
جالوصو أصبح صرايات !
والفلة وقعت في البير 
محروسة بي كم خنزير! 
لا محاسب لا كشف حساب 
لا ذمة لا اقرارات! 
&&&
بترولنا بى نسمع بيهو 
بس منو ما ضقنا ثمار  !
العائد أكبر مجهول 
وتوزيعو سر الأسرار !
أفتونا يا مدنيين 
ورونا يا ناس الجيش !
لى جدادنا ما نلقى العيش 
لى غنمنا مافيش برسيم! 
لو جعنا بس ناكل نيم 
كم ليلة القوى بتناهو 
واصبحنا زي الحطبات !!
&&&
اولادنا وبناتنا انتفضوا 
وكبارنا عاقدين النية 
الثورة حتملا السودان  
سلمية ثورة سلمية
دايرين الحكم المدني 
عايزين دولة مدنية  
دايرين في بلدنا سلام  
عايزين خبز وحرية 
طالعين الليلة وباكر  
استنو الجمع الجايات !
&&&
شعبية الثورة شعبية
مرقت وتاني ما بترجع!
مشروعكم افشل مشروع
لا بصنع ياخي لا بزرع!
سودانا سببتو حصارو
وتواصلو حكمكم ما بيرفع!
لروسيا وامريكا ركعتو
وشابكننا ابداً ما بنركع!
ما بتنفع رقصة ود بشة
في الساحة او في الشاشات!!
&&&
يا عطبرة يا حديد يا نار
اشعلتي للثورة شرارة!
نطقتي المدن الساكتة
وزيك هتفت بي حرارة!
تسقط بس تسقط بس
اهديتي للثورة شعارا!
بهدلتي المؤتمر الوطني
خليتي الريس يتجارى!
نتفتي دقون الكيزان
وزعمطي شعر الكوزات!!
&&&
الريس بقى ذاتو مزهمر
والوزراء كمان خرفانين !
ما عايزين جلكين يحكمنا
ما عايزين تاني جلاكين!
دايرين حكومة شبابية
شابات شبان واعين!
مافيش في خطابم جوطة
بي عصاية ما رقاصين!
باي باي للعصر الحجري
ما دايرين ديناصورات!!
&&&
ما افشل حكم الرجّالة
شوف ليبيا شوف السودان!
في بريطانيا وفي المانيا
ما انجح حكم النسوان!
شوف تيريزا وشوف انجيلا
انتاج ، حرية وامان!
عايزين في بلدنا رئيسة
تحكمنا بي حب وحنان!
شان نخلص من اي حروب
شان نرتاح من الجوطات!!
&&&
تسقط بس في حمار كتبوها
وفي وسط الشارع طلقوه!
ضباط الأمن شافوه
في البوكسي حالاً رفعوه!
ايه ذنبو برسيم ما لاقي
وما فاهم شان ايه قبضوه!
ياخ راعو حقوق الحيوان
يا اخوانا فوراً فكوه!
هو معروف بطبيعتو مسالم
ومن حقو يسير في مسيرات!!
&&&
يا ابو علوه جيب لينا كتايبك
من ضلك وجيب حرس الصيد!
ما بحلك تهديد يا ابو علوه
ما بفيد يا ابو علوه الكيد!
كل شعبنا مارق وما برجع
وما بخاف من زيد وعبيد!
اولادنا وبناتنا انتفضوا
ثوار كاسرين القيد!
مفروض يا ناس اتحاكم
القال انا عندي مليشيات!!
&&&
والله ده اغرب تصريح
من زول منجم مرتاح!
بيقول شبابنا البتظاهر
لا رغيف طالب لا ملاح!
ما عندو غير مطلب واحد
مشكلتو في الدنيا نكاح!
وشان يهدا الشارع السوداني
وتعم فيهو الافراح!
بي سرعة هاتو الماذون
واعقدو وسوو الحفلات!!
&&&
يا شعبنا يا ارقى معلم
ثورتنا ياخ حاجة تمام!
وهتافنا العالم سامعو
حرية عدالة وسلام!
كل يوم بكبر موكبنا
وثوارنا رامين قدام!
بلزمنا العصيان المدني
بلزمنا الاضراب العام!
شان عمك يشيل البقجة
وبي سرعة يكب الزوغات!!
&&&
يا بري يا ارض الاحرار
يا بري يا ثورة قوية؟!
اولادك وبناتك مرقو
سلمية ضد الحرامية!
الشهدا السقطو في ارضك
حيرفعو راية الحرية!
في مقابرك بهدلتي الأمني
وهوبة قلبتي العربية!
القاصد يهينك يا ويلو
بي عيونو يشوف الويلات!!
&&&
يا السادن يا زفت الطين
جايينا ناطي من وين؟!
تصريحك زي وشك ياخي
تصريحك اكتر من شين!
بتهدد الراجل يطلع
بتهدد بي قطع الريسين!
ما بتقدر تقطع راس زول
وطالعين هسه وبعدين!
يسقط بس السرق السلطة
يسقط بس حرامي الشهادات!!
&&&
يا بشة كيف ترقص ياخي
وبي هناك الناس جايعين؟!
يا بشة كيف تقدر ترقص
وبي هناك شباب مكتولين؟!
يا بشة ياخ خاف من ربك
يا بشة خاف يوم الدين!
الشهدا بي هناك راجنك
والناس بي جاي شاهدين!
يا بشة ياخ ارحل ياخي
حرقتا قلوب الامات!!
&&&
ود بشة لي جيشنا قال
وقولو مردود على نحرو!
لو دقت مزيكة الجيش
كل فار بدخل في جحرو!
يا بشة شوف وين فيرانك
الأكلو الكبرى في بحرو!
أولادنا ثوار احرار
للظالم تب ما بندحرو!
ويوم بكره كدايس ثورتنا
حاتقبض كل الفارات!!
&&&
طير طير يا بشير
اتظاهر شعب السودان!
باوامر بشة صرفولو
تخوين طلقة وبمبان!
سير سير يا بشير
اتظاهر حزب الكيزان!
باوامر بشة صرفولو
تموين ترحيل مجان!
شوف بشة في الشعب يكاوي
كية كية لا خد لا هات!!
&&&
ده الوطني بالحيل مخنوق
ما قادر ساكت يتنفس!
شوف عمك مادي القدوم
شوف وشو بالخلعة مكرفس!
اهو شبابنا للشارع مرقو
بالعلني مش بالدس دس!
رامين قدام بي حماس
وشعارم بس تسقط بس!
وشبابنا هم راس الحربة
وشوتاتم جوه الشبكات!!
&&&
الشعب السوداني بقولك
يا بشة ارحل يا بشة!
لا الكاكي بقدر يرهبنا
لا دوشكا تنفع لا هرشة!
تلاتين يا بشه كفاية
لا مصنع دور لا ورشة!
القرب من جوعو يموت
ما برحم اللاذي الكرشة!
أحسنلك هسع تتخارج
قبال تجيك الكشات!!
&&&
ده مواطن سوداني بقولك
يا سيسي بديك انا لكشر!
طالبنك يا سيسي حلايب
يا سيسي اوعك تتفشر!
بي ضنبك اوعك ما تلعب
قدام الأسد الكشر!
يا سيسي في شؤون سودانا
يا سيسي اوعك تتحشر!
ما تقولي يا ابن النيل
ما تقولي نحنا اخوات!!
&&&
يا شرطي اسمع ويا جندي
ما تكتل ابداً متظاهر!
في تراب ارض السودان
ما يسيل الدم الطاهر!
دي جريمة دولية خطيرة
وما بحلك الظرف القاهر!!
ده مواطن ومن حقو يعبر
من حقو بى رايو يجاهر!
لا خونة لا مندسين
ديل اهلك يا بلديات!!
&&&
يا راجل الناس بتموت
طلقات في الناس انطخن!
نسوانا للشارع مرقن
الدم في عروقن سخن!
لا ساطن ياخي لا فركن
لا عجنن ياخي لا لخن!
يا راجل قوم اطلع بره
لي متين تقعد تدخن!
يا راجل ورينا رجالتك
منعول خاش البوخات!!
&&&
ديسمبر ثورة شعبية
بتشرف كل السودان
من عطبرة لي ام روابة
من دنقلا لي بورسودان
مارقين اطفال وشباب
طالعين رجال ونسوان
طالبين الحكم المدني
حرية عدالة وامان
عايزين بنزين وغاز
دايرين رغيف وقريشات
&&&
لى رغيف بنزين او غاز
الناس واقفين في صفوف
اعدادم تب ما بتتعدا
عشرات ميات والوف
تتخابط ايدين رجلين
تتطاقش ريسين وكتوف
 دفير كوراك ومشاكل
شلاليت بنيات وكفوف
بي مهانة الناس رضيانة
عقبال صف الجلدات
&&&
للوالدة رسلنا قروش
بي حوالة قالو فورية
وصرافة عملت تحويلة
والبنك استلم النقدية
الوالدة ما استلمت شي
لا صباح لا حتى عشية
قالولا تب مافي سيولة
غشوها الناس الحرامية
في عطبرة لا حديد لا نار
كيف ياكلو حق الامات
&&&
في كسلا الناس بتموت
في كسلا الناس بتكنكش
كايسين للعافية كواسة
 وبعوضة في العافية تفركش
كل زول بقى جد محتار
العاقل بقى ذاتو مكشكش
الوالي في الكرسي ملصق
الريس في الكرسي مكنكش
واحدين في اشقى شقاوة
وواحدين آخر راحات
&&&
حمدوك قالولو تعال
كون لينا وزيرن للمال
جيب لينا يا زول دولار
يازول جيب لينا ريال
عايزين ماكول مشروب
 دايرين ملبوس ونعال 
الحال بقى واقف دوت
 الحال بقى جد بطال
حمدوك قال ليهم كو
 حمدوك كبا الزوغات
&&&
شوف بشة يرقص مبسوط
وفوق راسو يلعب عكاز
وكل يوم اسعار بتزيد
مافيش لا فحم لا غاز
وصفوف الناس واقفين
ومافيش عيش الخباز
وصفوف عربات واقفين
ومافيش بنزين لا جاز
في طلمبة لعبو الكوشتينة
في طلمبة صلو الجمعات
&&&
يا ساعة هم قالو عقاربك
مطلوقة وبس لازم ترجع 
شان زمنك يصبح مظبوط 
زي ساعات العالم اجمع
تقديم تأخير على كيفم
حاجات زي لعب الشفع
يا ريت كل عقرب يرجع 
لى جحرو وابداً ما يطلع 
شان نرتاح من العضعيض 
شان نرتاح من اللدغات 
&&&
وحوار الوثبة ابوه 
الصادق عرمان وامين
واحدين قاطعين الحركة 
واحدين للناس قايلين 
وحوار ودبشة رئيسو 
ما بنفع لي يوم الدين
بيحاور في نفسو براهو 
ولسانو زي السكين 
ليه يعني لامين الفكة 
ليه يعني عاملين جوطات
&&&
الزول ما فاهم حاجة
الزول بقى جد محتار 
فد مطرة فضحتنا فضيحة
في شوارع صبحت انهار
كم ناس بي هناك بتموت
في بيوت تتماص تنهار
وبيجاي  حاكم ومعارض
مشغول بي كوار وحوار
يا بلدنا يا كايسة سلام
يا بلدنا سلامات سلامات
&&&
سودانا حالو شالوه 
عفصوه داير ما يدور
قبضوه لا ما قبضوه 
شطبوه راس الغندور 
مرقوه بي سرعة شديدة 
قبال ما الحلة تفور 
يا ريس الزم خرتومك 
للخارج اوعك ما تزور 
قبضوه لا ما قبضوه 
جاطونا اولاد الهرمات 
&&&
ام قسمة فرحتي قلوبنا 
ام قسمة زعلك ممنوع 
ام قسمة قصيهو شريطنا 
افتتحي كل يوم مشروع 
ما يهمك زولن دهناس 
ما يهمك زولن جربوع 
بي شايك عالجتي بنيتك 
بي شايك حاربتي الجوع 
بي بنابر سويتي منابر 
وكانونك حلحل ازمات 
&&&
بال ميري مسكون بالهم 
ناس زهرة يشكن وحواية 
غير شاينا كيفن حنعيش 
بنربى جنيات وصبايا 
الكشة كابوسنا اليومي 
يا ماشا فوقنا يا جايه 
يا اخوانا كيف ست الشاي 
تتعامل زي ست انداية؟ 
كم مرة ياناس كشونا 
ما خلو لينا الحبايه 
كم مرة طفقو البراد 
كم مرة كسرو الكبايه 
كم كشحو شايات وسكاكر 
كم دفقو ازبط جبنات 
&&&
العالم فاهم لعبتكم 
تصويتكم كذبة إبريل 
وفيلمكم معروفة بدايتو 
ونهايتو مكشوفة عديل 
في الأول رقصة ود بشة 
وفي الآخر تكبير تهليل 
غير بشة حوا ما ولدت 
ود بشة ما عندو بديل 
ستطاشر نازلين ترشيح 
بس واحد يدو الاصوات 
&&&
الدين لله يا زول 
بي الدين ما تاكل عيش 
لى بشة ما تسوي دعاية 
ما تضرب ليهو اورنيش 
يازول اقعد في محلك 
يازول سيب الهبيش 
ود بشة ما جا بتصويت 
جا السلطة بسلاح الجيش 
ود بشة حيفوز حيفوز 
ايه يعني لزوم الغشغيش 
يا زول خليك حقاني 
يازول سيب الحركات 
&&&
بارودي كيف يصبح ريس 
وشعيب كيف يبقى رئيس 
ود بشة ما بطلق سلطة 
بى قوة أو بي تحنيس 
مرجوعة باكر لي حبلو 
والحولو تحليل تتيس 
ماذونو جوه الصندوق 
وشهودو لابدين في الكيس 
ليه يعني لامين الناس 
ليه يعني ساوين حفلات 
&&&
ابليس خالف رجلينو 
وغنمو سارحات بالراعي 
وحوار وحلانة لساتكو 
ما بقوم بي دفع رباعي 
هاجوج عايزو بالجملة 
ماجوج دايرو قطاعي 
طالعين بس مافي لزوم 
نازلين بس مافيش داعي 
يا شعبنا ضاعت اموالك 
في وفود في طيارات 
&&&
ومجنون عامل تصويت 
بيجنن كل العُقّال !
متحكر في نص الساحة 
لي غيرو ما مدي مجال!
بيغنى براهو ويصفق 
ويدق نوبة الطبال !
بيرقص في الدارة براهو 
من روحو بيشيل شبال!
بينقط لى روحو براهو 
ويبعزق في المليارات!!
&&&
وضحية حسبوها خروف 
وضحية شعباً بي حالو 
الضاعو بناتو واولادو 
الضاعو حريمو ورجالو 
الدينو بقى اكبر دين 
واسبابو كانو وما زالو 
الريس بس عامل نايم 
ضربولو قافل جوالو 
الحال بس واقف دت 
لا تفاوض لا خد لا هات 
&&&
يا شعبنا يا اكبر فاهم  
ما بغشك السوى الغلطة  
وخطاب جد ما مفهوم 
للسامع بيسبب جلطة 
ما فيهو حباية منطق  
مخلوط بي مية خلطة  
الحل تقسيم الثروة 
الحل تقسيم السلطة 
الوثبة القالو عليها 
يا اخوانا ساكت حركات 
&&&
فد مطرة الحالة تقيف  
تتقطع طرقات وكباري  
بالمرة مافيش تصريف  
مافيش خيران ومجاري 
ومسئول ضارب التطنيش 
بيصهين ويعمل ماداري 
في العيد تنهدا بيوت 
الناس خايضين كداري  
في العيد اطفال بتموت  
بي سيول بي فيضانات  
&&&
الشهدا السقطو في دارفور 
الشهدا السقطو في نيالاّ 
ما تنسو يا اخوانا حقوقم  
بقارة اتلمو واباله 
الضرب الرصاص الحي 
الاصدر امرو بي نذالة 
مفروض يا ناس يتحاكم 
دايرين قانون وعدالة 
يا عالم مطلوب تحقيق 
بي نزاهة بي اجراءات 
&&&
ورسوم راجياك بيجاي 
وجباية حارساك بيهناك
على راسك تدفع دقنية 
النبكة مقسومة معاك
وضرائب حولك تتحاوم 
لو تجري تلقاها وراك 
التور ذاتو يحلبوه 
الأرحم عهد الاتراك 
باى باى سوولا رسوم 
تحصيلا بدون إيصالات 
&&&
الفار فرفر في الفروة 
شابكنا يوماتي فتاوي 
كم أرنب جوه الطاقية 
مستني منديل الحاوي
الحاجة اليوم تتحرم 
وينكتلو علشانا شباب 
تتحلل في اليوم التاني 
ويقولو لي ناسا حباب 
الجن من جنو اتجنن 
واتعوذ من الكضبات 
&&&
ابليسنا سارح بي غنمو 
وغنمو سارحات بالناس 
الكان مستور الحال 
الليلة مقطوع الراس 
الفاطي سطرين وتلاتة 
الفاطي كل الكراس 
لا يحلو الشيخ الجعلي 
لا تحلو سيطان كدباس 
البيتو بقى بيت مسكون 
والحلة بيوت مسكونات 
&&&
عمّي على ضاق بيهو الحال 
ساب مرتو خلالا البيت 
عمّي على باظت أعصابو 
واخلاقو قطعت كم خيت 
عمّي على أصبح نقناق 
ومين يسمع في بلاد الواق 
عمّي على ضاق خيرا زمان 
والليلة ما شايف حاجة 
بتمنى الماضي يعود 
ويحكمنا من تاني خواجة 
لا وطني نافع لا امة 
لا حركة لا مؤتمرات 
&&&
الشافع بس الله معاهو 
الشافع ما لاقي اللقمة 
الشافع ما لاقي دواهو 
الشافع أصبح بكاي 
الشافع أصبح ضبلان
كرشوه من جوه الاوضة 
طردوه من الديوان 
حرموه من أي حلاوة 
حرموه من باقي الشاي 
في العيد ما يشوف عيدية 
بي عينو ما يشوف لعبات 
&&&
الطالب طالب من الله 
كيف يصبح من الشطار؟ 
كل همو بقى بس في بطنو 
كيف يقطع كمين مشوار 
الجامعة يا حليل الجامعة 
لا صفرة لا داخليات 
الجامعة يا حليل الجامعة 
لا معامل لا مختبرات
&&& 
الكهربا بتسل الروح 
بتقطع من دون انذار 
الموية تقطع على كيفا 
وتنشف حلق الأزيار 
الازمة من دون تفسير 
ما النيل هو أبو الأنهار 
لو اصلو معدوم الفائدة 
لو مويتو صبحت سجمانة 
بيعوه لشعوب عطشانة 
عبوه في جركانات 
&&&
تلفازنا بوظ اعصابنا 
النشرة زي حفلة ظار 
بيجاي واحدين بيكوركو 
بيهناك بيدقو الطار 
النشرة مجروس متحرك 
والعسكر يلعب بالنار 
وعكليتة يقدم برنامج 
طفشنا من السهرات 
&&& 
فنانا أصبح هناق 
بيغنى غنا ما مفهوم 
بيعكر جو أمدرمان 
بيفور دم الخرطوم 
النجم الأوحد في سمانا 
مداح بيغني الراب 
يتلولح زي شافع الروضة 
يطوطح من دون أسباب 
حنينا لي حقيبة الجن 
حنينا لي الحكامات 
&&&
الكورة صبحت دافوري 
اللاعب أصبح كحيان 
يا دوب قادر يتحرك 
كيف يعني حيجيب اقوان 
ومعلق باظت اعصابو 
ومشجع مسكين غلبان 
وبلاد ما تسوى الحبة 
تغلبنا جوه السودان 
البلعب دون ميزانية 
ايه يجني غير الخيبات 
&&&
القومي في امم افريقيا 
لا ريحة لا طعم لا لون 
في تلاتة غلبونا تلاتة 
ما طلعنا ولا مرة درون 
ما تزعل أبداً يا فردة 
لو تيمنا واقف كراكون 
ما عزانا الاوحد يا سادة 
في نفسنا جبناهو القون 
ايه يعنى علم السودان 
ايه يعنى حدود ما معروفات 
&&&
للهجرة الباب مفتوح 
الرايح انشالله يروح
الهاجر من ضيق الحال 
الهاجر من ضيق الروح 
الهاجر من فصل جماعي 
بالجملة أو بالقطاعي 
كم جيل بدل جيناتو 
كم جيل اتناسى قديمو 
لو طرتا لي آخر الدنيا 
لو رحتا بلاد الاسكيمو 
حتقابل زول أو زولات 
&&&
في الغربة بتلاقي مصايب 
في الغربة بتلاقي مآسي
دكتور شغال جرسون 
ومهندس شغال تكاسي
واحدين ساكنين مقطورة 
كان احسن سكنة تنقاسي 
واحدين ساكين الميتة 
ما شبعو من الصدقات
&&& 
الغربة صبحت ملعونة 
الغربة صبحت بطالة 
لا سفارة تنصر مظلوم 
بي هرشة او حتى رسالة 
كم زول مغلوب على امرو 
معصور بكفيل وكفالة 
قلاع يقلع مقلوع 
لا منطق ينفع لا رجالة 
واحدين في محلك سر 
واحدين قايمين دفرات 
&&& 
وحكومة شغالة رجالة 
بالعلني قالت لي ناسا 
الداير حقو يحاربنا 
سيبونا من اي سياسة 
كل حتة مرقت بسلاحا 
كل حتة جمعت فراسا 
خايفين من الشايفنو 
خايفين من الزندية 
خايفين سودانا يضيع 
يتقسم زي كمونية 
كل حتة تتناول كوما 
وتتحول لي جمهورية 
الحال ممكن يتلخبت 
والواقع يصبح كالآتي 
كل حلة ترفع اعلاما 
تتمتع بالحكم الذاتي 
الشايقي ينازع الجعلي 
في حدود ما مرسومات 
&&& 
وحكومة شابكنا حليفة 
الوزرا يحلفو بالدور 
قوات دولية يمين 
ما تدخل اقليم دارفور 
وكم قوة دولية تحوم 
في جنوبنا وجبال النوبة 
المنطق راح في حق الله 
والجوطة قلبت كم هوبة 
والهوبة انقلبت تاني 
الهوبة صبحت هوبات 
&&&
وجنوبي وشمالي اتشبكو 
كل واحد بيكورك عووك 
صرتنا في ابيي مدفونة 
لا جدك هيلو لا ابوك
في ابيي الموت بالكوم 
في ابيي الدم مسفوك 
في ابيي الجن متحرك 
في ابيي شيطان مفكوك 
يا ساتر استر يا ساتر 
تنحلا باخوي واخوك 
سوداني يكاتل سوداني 
وابليس ضارب الراحات 
&&&
الإحصاء قرب يا اخوانا 
ورونا كيف حيعدونا؟ 
الطفشو ضعفين الفضلو 
حيجلو مهما يحسبونا 
كم مرة جاطت حسبتنا 
كم مرة جاطو وجاطونا 
كم مرة قسمونا وضربو 
كم مرة جمعو وطرحونا 
شالونا من خانة الزيرو 
في خانة الماينس ختونا 
&&&
في النظري طالعين الاول 
في العملي طالعين الطيش 
في الشارع اجيال بتضيع 
وكل كيلو نقطة تفتيش 
الشعب ممنوع ما يرقص 
ما يفرفش وسط الحفلات 
والكاكي يرقص على كيفو 
بي عصاية وبي رشاشات 
يابلة كيفن نتحلا 
شربكنا زولن اتشربك 
واتورط جوه الشبكات
&&&
وسدود بالقوة تقوم 
وتهدد اوطان وتراث 
الراي الرسمي اتنفذ 
ما مهم رد فعل الناس
الصهين باكر يترحل 
بي الموج أو بي الحراس
القاوم خنقو البمبان 
القاوم كتلو الرصاص
منصوري قمعوه ومحسى 
مافيش لا خد لا هات 
&&&
الدولة الشمولية اوانطه 
والكورس بيقول آمين 
الدين قلبوه سياسة 
حكمونا تجار الدين 
أي فشل سموه البلوى 
بس مين حيحاسب مين؟ 
وجهلول ادوه حصانة 
تحميهو لى يوم الدين 
البنقد حكمو التكفير 
ينفوه من الملات
&&&
إسلامي وكمان نصراني 
ويهودي وود غابة كمان 
سودانا متحف اديان 
سودانا متحف اجناس 
بتفرتك لو اتعالينا 
ومسكنا جن الطغيان 
بتوحد لو اتصافينا 
وراعينا حقوق الإنسان 
الحل واضح يا اخوانا 
مش محتاج لى تنظيرات 
يلزمنا التنفيذ العملي 
يلزمنا حسن النيات 
&&& 
وحكومة اكتر من فاشلة 
والشعب زي المافيش 
حكموهو باقسى طواري 
لكنو ضارب التطنيش 
قمعوهو صهين ما ردا 
رفوهو رضى بالتهميش 
في الشارع قبلان يتفتش 
ويتفرج على كل تفتيش 
من وين جوك الدايشين 
من وين جوك الدايشات؟
&&&
اوكامبو بقى اشهر زول 
وسيرتو في كل لسان 
عايز يقبض الريس ذاتو 
ويختو جوه الليمان 
اوكامبو رقصنا التانغو 
اوكامبو نسانا بطان 
بالحكمة لوما حليتوها 
بتعاقب كل السودان 
كل زول حيضوق الحنضل 
وتحاصرو ظروفن مرات 
&&& 
اوكامبو من قدم طلبو 
فرتكنا كيمان كيمان 
واحدين طايرين بالفرحة 
شايفنو احسن ما كان 
واحدين هايجين فايرين 
شاتمين اوكامبو كمان 
واحدين عايزين الحكمة 
شان يسلم كل السودان 
واحدين عاملين نايمين 
واحدات عاملات نايمات 
&&&
اوكامبو من قام اتجنن 
جننا وجنن نادوس 
عيشنا في أكبر هرجة 
عيشنا في كم كابوس 
وحكومة تتحدى العالم 
بخطاب بالجن ملبوس 
والحل في الحل السلمي 
المخرج في ساس يسوس 
ما بنفع كل الكوراك 
ما بتنفع كل الجوطات 
&&&
الريس اصبح مطلوب 
كايسنلو نسوان راجلات 
ما بنفع غزغيز الريش 
ما بتنفع كل الحركات  
ما بنفع طرد البيغيثو 
ما بنفع هرش الخواجات 
ياريس بس اركب عجلة 
ما تفكر في الطيارات 
&&&
الريس بيزور موريتانيا 
عقبال توغو واخواتا! 
كان احسن يمشي الحتانة 
كان احسن يمشي الحواتة!
لكن خلوه ينوع  
أوربا يا اخوانا حلاتا!
سيبوه يسافر بريطانيا 
يتقدل في لندن ذاتا!
&&&
القالو عقلاني وفاهم 
في راسو اصبح عيان 
بيقول قبل الإنقاذ 
كان بشحد شعب السودان 
يا راجل بس عاين حولك 
اتلفت في كل مكان 
ملايين عايشين بى اغاثة  
في الفاشر في امدرمان 
وحكومتك مادا الكورية 
وما بتفتر من الشحدات 
&&&
ابيي النبكة الحلوة 
قسموها بى خيط ميزان 
ابيي وحدة ارواح 
ابيي وحدة وجدان 
كيف تقبل قسمة لاهاي 
وتتقسم بين الحبان؟ 
الواحد يصبح اتنين 
العايلة تصبح جيران 
ملعون ميتين لاهاي 
وين حكمة اهل السودان؟ 
&&&
سكتنا القالو حديد 
يا اخوانا صبحت مافيشة 
العامل بالجوع بيموت 
لو زاغ من التفنيشة
الكان يا ناس تفتيحا 
الليلة اصبح هو الكيشة 
الراتب ما بعيش النملة 
كيف يعني حيكفي العيشة؟ 
&&&
يا اهلنا في اغلى جزيرة 
مشروعكم كيفن يتباع؟ 
ياكم قلب السودان  
ياكم احسن زراع  
من دون طين الحواشة 
ما فيش لا راس لا كراع 
افدوها بالروح والدم 
ما يشيلو ولا حتى ضراع 
لو راحت من ايدكم بكره 
حتروحو شمار في مرقات 
&&&
قانون الامن الوطني 
بالقوة اصبح قانون 
تهديد لى كل معارض 
في جو بالخوف مشحون 
تنتخبو او ما تنتخبو 
الفوز للكوز مضمون 
ايه يعنى لزوم التصويت؟ 
يا عاقل وري المجنون 
&&&
خرطتنا الليلة انقسمت 
الليلة ضاع السودان 
ناس منقو الليلة انفصلو 
وناس تنقو ضبحو التيران 
والنار في جبال النوبة 
والنار حرقت قيسان 
سوداني يكتل سوداني 
خيبتنا صبحت خيبات 
&&& 
مشروعنا القالو حضاري 
غرقنا في حروب وحروب 
فرقنا شرقاً وشمال 
فرقنا غرباً وجنوب 
لا سلطة تنفع لا ثروة 
ما دام ضاع الانسان 
يا حليلو الكان سوداني 
يا حليلو الكان سودان 
الفاتحة على ناس عايشين 
لاكين زي الأموات 
&&& 
الصورة الكاملة بتزعجنا 
وتفصيلا اكبر ازعاج 
تفكيرنا دايماً مشلول 
فوق راسنا سيف الحجاج 
وجهتنا دائماً مجهولة 
رؤيتنا مليانة عجاج 
الامة ساكتة بتتفرج 
ومثقف ساكن الابراج 
ومصيرنا معلق بي شعرة 
وقعتنا صبحت وقعات
&&&
نادوس يا رمز الطيبة 
نادوس يا وش الخير 
نادوس يا سكة عديلة 
نادوس يا خط السير 
خلصنا من الكابوس 
انقذنا من الكسير 
زودنا ببصارة وحكمة 
شان نبقى يوم بكره اخير 
ونتحرر من الاوهام 
ونتخارج من الورطات 
&&&
فيصل الدابي/المحامي
عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

انقر هنا لقراءة الخبر من مصدره.

نشكركم متابعين وزوار موقع المصرية السعودية على الثقة والتواجد، كما نعدكم بتقديم كل جديد وهام من كافة المصادر الإخبارية الموثوقة، وقد تم نقل ( المعلقة السودانية الحب في زمن الثورة! .. بقلم: فيصل الدابي ), والمصدر هو المسئول عن ما ورد بالخبر.
المصدر : سودارس

التالى محافظ المنيا يشهد احتفال مديرية الأوقاف بليلة القدر